La nueva llei d’educación, la Lomloe, aprobada’l víspora de la Nuechebona, contién dos grandes novedaes para’l Bachilleratu, que se van empezar a aplicar a partir del próximu cursu en primeru y del 2023-24 en segundu, pero no que cinca a dir a la selectividá con un suspensu, va desixir 4 condicions.
De manera escepcional los alumnos van poder llograr el títulu y presentase a la selectividá con una asignatura suspendida y, tamién en casos escepcionales, estos estudios, la educación secundaria cimera, va poder realizase en trés cursos en cuenta de los dos ordinarios para facilitar la so superación. El borrador del real decretu qu’ordena y define cómo reorganizar estes enseñances, que’l Gobiernu va aprobar a empiezos de 2022, desvela agora la lletra pequena, les esixencies y condiciones que tendrán de cumplir quien pretendan beneficiase d’estes disposiciones escepcionales.
Como norma xeneral caltiense que pa llograr el títulu de Bachilleratu tienen de tenese aprobaes toles asignatures, pero tamién se va consiguir con un suspensu si l’estudiante cumple cuatro esixencies. Que los sos profesores coincidan en qu’algamó los oxetivos y competencies de la etapa, que nun hubo inasistencia inxustificada a la materia, que realizó toles actividaes esixíes d’evaluación y presentóse a toles pruebes, incluyida la recuperación de final de cursu (en xunu o setiembre), y que la so nota media, incluyida la del suspensu, ye de 5 o perriba. La tercera de les esixencies tien sentíu porque nesta etapa, a diferencia de lo que va asoceder na ESO tres la reforma en marcha, caltiense la convocatoria estraordinaria para quien suspenda na evaluación final.
El Bachilleratu de trés años, nel que se van partir les asignatures de los dos cursos ente unu más, tamién va tener beneficiarios tasaos. Solo ta dexáu p’alumnos con dalguna necesidá específica de sofitu educativu (discapacitaos), pa mozos que cursen en paralelu enseñances profesionales de música, pa deportistes d’altu nivel, y p’alumnos qu’alieguen xunas circunstancies que la xustifiquen.
El borrador de decretu, como la llei que desenvuelve, indica que de primeru de Bachilleratu a segundu solo podrá pasase con un máximu de dos asignatures pindies y especifica qu’en casu de terminar segundu con más d’un suspensu, l’alumnu va poder escoyer ente matriculase solo d’eses materies y llograr el títulu o repitir segundu completu. Van poder estudiar Bachiller escepcionalmente en trés años los discapacitaos, deportistes y quien cursen la carrera musical
La secundaria cimera podrá estudiase al traviés de cinco modalidaes, caúna col so propiu itinerariu de materies, empobinaes a la caña universitaria a la que s’aspire. Son les yá esistentes d’Humanidaes y Ciencies Sociales, de Ciencies y Tecnoloxía y d’Artes –que s’estrema en Música y Artes Escéniques y Artes Plástica, Imaxe y Diseñu–, y la Xeneral, nueva, qu’incorpora conocencies d’humanidaes, ciencies y arte, pensada pa quien pueden empobinase a carreres mestices como Psicoloxía, Socioloxía o Periodismu.