La conseyería d’Educación del Principáu calcula que va recibir 32 millones del fondu estatal para la enseñanza y cifra en 40 millones el costu de contratar a los mil profesores que camienta necesita pal nuevu cursu.
La Conseyería d’Educación empecipió esta selmana les conversaciones colos sindicatos para diseñar el próximu cursu escolar y magar nun hai nada decidío, sí hai delles realidaes a tener en cuenta. La primera, qu’en centros educativos d’Uviéu, Xixón y Avilés hai verdaderos problemes d’espaciu pa desdoblar les aules, colo que tien de empezase la gueta d’equipamientos cercanos y la consiguiente negociación colos conceyos. La segunda cuestión importante ye’l costu que va tener tou eso para les arques del Principáu. El presidente, Adrián Barbón, comprometióse a aumentar les plantiyes el próximu cursu p’atender les necesidaes de les aules desdoblaes (obligatorio, si’l máximu por clase tien de ser de 20 alumnos). Con éses, la conseyería tien les cuentes echaes: contratar a mil profesores costaría 40 millones d’euros. Si s’atiende a les pretensiones sindicales, que falaron de la necesidá de cuntar con ente 3.000 y 4.000 docentes más, la cifra dispárase. Bona parte d’esos 40 millones pa la contratación sufragase cola partida de 2.000 millones d’euros pa Educación que l’Estáu va partir ente les comunidaes. Envalórase qu’Asturies recibiría unos 32 millones, o esa ye, siquier, la estimación de la conseyería.
Pero ye qu’Asturies va recibir en total unos 280 millones d’euros, de los qu’el 77% van ser destinaos a sanidá y educación, polo que ye posible que los 32 millones sían, finalmente, más. Claro que non tola cuantía puede ser pa personal, porque va haber otros gastos, como la compra d’ordenadores. Rescampla que la enseñanza va llevase bona parte de los esfuerzos, teniendo en cuenta que’l próximu nun va ser un cursu normal.
Y mientres s’estudia cómo va ser el próximu cursu, sí se sabe en qué feches va desenvolvese. El BOPA publicó ayeri’l calendariu escolar 2020-2021, qu’entama’l 10 de setiembre pa Infantil y Primaria y el día 14 pa ESO, Bachilleratu y FP. El primer día non lectivu del cursu va ser el vienres 30 d’ochobre, allargando asina la fin de selmana de’l 1 de payares. Son festivos nacionales el 7 y 8 d’avientu, llogrando una ponte de sábadu a martes. Tocantes a les vacaciones de Navidá, van empezar el 23 d’avientu y van enllargase hasta’l vienres 8 de xineru. Tamién tán señalizaos como festivos el 15 y 16 de febreru. Selmana Santa entama’l 29 de marzu, hasta’l 5 d’abril, dambos inclusive. El cursu va rematar el 21 de xunu pa Infantil y Primaria.