La Conseyería d’Educación autorizó l’apertura d’un centru priváu de formación profesional denomináu ‘Campus FP Xixón Social Media’. Asina lo recueye’l resolvimientu publicáu la selmana pasada nel Boletín Oficial del Principáu.
El nuevu centru ta impulsáu pola sociedá Formación Internacional Vocacional y Emprendimiento S. L. (FIVE S. L.), con see en Boadilla del Monte (Madrid).
El ‘Campus FP Xixón Social Media’ va Tar allugáu nel númberu 3 de la cai Santa Teresa de Jesús y va impartir dos ciclos de grau cimeru: el de Técnicu Cimeru en Desenvolvimientu d’Aplicaciones Multiplataforma, con un grupu en primer cursu, y otru de segundu, con 20 alumnos cada unu en vez; y el de Técnicu Cimeru en Desenvolvimientu d’Aplicaciones Web, tamién con dos grupos, de venti estudiantes, cola salvedá de que, nesti casu, va ser con horariu vespertín.