Poderosos ‘riffs’ de guitarra, guiños al funky, hestories a ritmu de reggae y contundencia ska. La banda de rock Dixebra texe con eses blimes el so discu númberu ocho, que saldrá a la cai na primavera de 2005 pero que’l grupu empezará grabar nos estudios ‘Tutu’ de Corvera a partir del mes d’avientu, cola idea de sometese a un procesu final de creación más reposáu qu’en trabayos anteriores.
La salida al mercáu del octavu cedé de la banda avilesina conmemorará la mayoría d’edá de Dixebra, yá que’l grupu cumple dientro d’unos meses los 18 años n’escena como únicu referente afitáu y durable de la música rock en llingua asturiana. Por esa razón, los miembros del conxuntu entrarán al estudiu de grabación con más calma que n’ocasiones anteriores.
L’asoleyamientu del nuevu trabayu discográficu de Dixebra, pal que’l grupu inda completa una llaboriosa esbilla de bases musicales a partir de decenes d’idegues, supondrá’l regresu de la banda con temes de nueva creación tres años depués de la publicación de ‘Sube la marea’, un cedé grabáu nuna selmana nel estudiu que rexenta nel País Vascu el productor y músicu Kaki Arkarazo.
La última incursión de Dixebra nel mercáu con nuevu productu prodúxose hai agora un añu, cuando la banda editó ‘Cróniques d’un pueblu’, un cedé recopilatoriu xunta un llibru cola hestoria’l grupu escritu pol periodista xixonés Francisco Álvarez.
Fundada n’Avilés nel añu 1987, y con una llarga esperiencia dende entós tanto nel estudiu como nel directu, la banda Dixebra fizo del usu esclusivu de la llingua asturiana la so seña d’identidá y evolucíonó, a lo llargo de les sos casi dos décades de vida, p’hacia un soníu propiu construyíu colos preseos tradicionales del rock y destacada presencia de los metales (trompeta y saxu).