Dixebra celebra 25 años con un discu especial

La banda de rock Dixebra celebra’l so 25 aniversariu cola edición d’un trabayu discográficu mui especial. Con un formatu de lluxu bien atractivu y orixinal (imitando un moleskine y a mou de diariu nel interior, amás d’un cedé que fai alcordanza del vinilo), la obra quier ser un repasu per dellos de los momentos y estilos que marcaron el devenir de la formación, nesti sen apaecen temes de calter punk, rock, reggae, ska, funk, folk o rap. El discu inclúi bien de versiones nueves de pieces que supunxeron un fitu na so trayectoria (casu de «Merucu Xusticieru», «Canciu d’amor», «Queda la rabia», «Xuacu xinta xorra»…) o otres menos conocíes pero que quixeron volver a grabar («Dacuando», «Si vienes», «Vaqueira»…), remezcles («Pal Caribe», «Wilma Loulé»…) y inclusu inéditos (por exemplu «Nun puxa» –versión de «God Save The Queen» de los Sex Pistols-, con arreglos y lletra nueves dafechu), tamién se fai una retrospectiva sonora de les sos grabaciones en toos estos años, conformando un repertoriu total de venti cortes; a too ello hai qu’añadir dellos samples que refuercen y complementen dalguna de les temátiques de les canciones. La producción tuvo a cargu de Sergio Rodríguez, collaborador avezáu del grupu y responsable de Tutu Estudios.

Amás de los músicos actuales collaboren na grabación excomponentes, amigos y intérpretes destacaos de la escena asturiana: Israel Sánchez (El Sueño de Morfeo), Rubén Bada, Pablo Carrera (Duerna), Lisardo Prieto (Felpeyu), José Manuel Tejedor, Daniel Álvarez (Corquiéu), Miguel Herrero, etc. Otra manera, el llibretu recueye testos firmaos por Beatriz Redondo Viado (periodista), Miguel Fernandi (músicu), Roberto González-Quevedo (escritor y académicu de la llingua asturiana), Xicu Ariza (músicu y periodista), Pablo Texón (ecritor) y David Artime (periodista), que reflexonen alredor de lo que significó y significa Dixebra pa la llingua asturiana o la escena musical del país en xeneral y pa ellos en particular; la parte lliteraria zárrase con un cuentu futurista que se desenvuelve nun conciertu de la banda.

Dixebra tenía’l so primer ensayu un seis de xineru del añu 1987 nunes cocheres de Castañeda, en Corvera, dende esi momentu, esta banda formada por componentes d’esi conceyu y del d’Avilés, entamaron una carrera sele pero segura que los llevó a convertise nún de los grupos más importantes de la escena asturiana d’estos venticinco años. Nesi tiempu dieron infinidá de conciertos per toa Asturies, l’Estáu español y Europa, grabaron diez discos y foron incluíos n’abondos recopilatorios; foi’l primer grupu de rock asturianu qu’actuó nel Festival Intercélticu de Lorient y tamién el primeru que representó a la llingua asturiana nel festival de la canción en llingües minoritaries europees Liet International en Laponia (onde llogró’l segundu puestu) y tien recibío dellos premios tanto a nivel asturianu como estatal.

Falar de Dixebra ye falar de la llingua asturiana, porque la so fidelidá a esti idioma ye una de les señes d’identidá de la banda, amás del so compromisu social, políticu y llaboral, que demostraron dende la so nacencia solidarizándose con munches de les lluches d’esi calter que se desenvolvieron nesta tierra. Ensin dulda Dixebra son ún de los referentes musicales d’Asturies, que festexa agora’l so venticinco aniversariu pero que sigue cola vista puesta nel futuru porque tovía tienen ganes y fuercia.

Esta edición de lluxu vien a face-yos xusticia y de xuru va prestar abondo a tolos sos siguidores. N’otru sen, ye la primer producción de Discos L’Aguañaz como división musical de Goxe Producciones, depués de la salida de la primera de Publicaciones Ámbitu, colo que recupera la so identidá y personalidá propia y entama un llabor que quier valir d’encontu a la música asturiana contemporánea.