Redacción.
El martes que vien entama en Xixón l’actividá ‘Deva peles siendes d’Andres Solar’, unes xornaes de visites guiaes organizaes pola Oficina de la Llingua de Xixón dientro de los Programes Educativos del Ayuntamientu de Xixón y embaxo la coordinación de Sabel Tuñón ya Inacio Rodríguez-Solar. Dende’l martes que vien y a lo llargo d’ocho díes, 300 neños y neñes de nueves escueles públiques xixoneses van percorrer los caminos onde vivió Andres Solar y conocer la so vida y obra lliteraria.
La visita inclúi una esplicación del procesu d’ellaboración de la sidra nel Llagar Piñera, dende la collecha a la venta de la mesma. Darreu esplícase a los neños, a lo llargo d’un paseu pela parroquia, los distintos edificios hestóricos, la fauna y flora colos so nomes n’asturianu y la forma de vida autárquica que se vivía na parroquia non va muncho.
Dempues visítase la casa onde vivió Andres Solar y la so escuela, onde los rapazos van visitar una esposición alredor de la figura d’Andres Solar Santurio. Por mor d’estes actividaes editóse la guía didáutica col mesmu norme ‘Deva peles siendes d’Andres Solar’, que sirve d’apoyu a les actividaes sobre’l tarren.