Denuncien “menospreciu institucional” pola ausencia de representación d’altu nivel na entrega de los Premios Lliterarios

Un añu más el Gobiernu d’Asturies entregó los sos Premios Lliterarios n’asturianu, los máximos gallardones institucionales del país, ya Iniciativa pol Asturianu denuncia que se fizo “ensin presencia institucional d’importancia”. Dende esta organización entrúguense “¿ónde ta’l Presidente Javier Fernández nun actu de la importancia d’estos Premios?”. La organización denuncia que “amás de nun tar el Presidente d’Asturies, como ye vezu, esti añu nin siquiera se cuntó cola asistencia de la Conseyera de Cultura”. Entrúguense tamién “sí dalguién podría xustificar que’l Ministru de Cultura nun asistiera a los Premios Nacionales de Lliteratura, equivalente estatal d’estos gallardones”, espliquen.

Iniciativa pol Asturianu denunció al traviés d’una nota de prensa “qu’esti nun ye’l primer menospreciu de la Conseyera de Cultura a los gallardonaos con estos Premios”, recordando que yá a finales de 2012 “llegó media hora tarde a la presentación de les obres ganadores d’estos premios na so anterior edición y nun participó del actu”. El Gobiernu d’Asturies, que rebaxó de 12.000 a 4.000 euros la cuantía de los premios, “habría facer un esfuerciu por promocionar la lliteratura asturiana cola presencia d’una mayor representación institucional”, reducida nesta ocasión a la presencia d’un viceconseyeru.

Iniciativa pol Asturianu felicitó tamién a los gallardonaos y sumóse a la so reivindicación, fecha nel actu, d’oficialidá pa la llingua asturiana, y de que nes convocatories de los Premios Nacionales de Lliteratura, puedan participar obres n’asturianu, como -recuerden- “pasa col restu de llingües oficiales del estáu”.

Nel actu, el viceconseyeru Alejandro Calvo faló de «los esfuercios que fai’l Gobiernu d’Asturies pa garantizar la presencia del asturianu nel sistema educativu cola nueva Llei LOMCE» o que «ye debío a lleis como ésta lo dificulta’l reconocimientu del asturianu como llingua oficial» no que pa Iniciativa pol Asturianu “ye una verdadera tomadura de pelo a los asturianos”, pues la única forma de garantizar esa continuidá del asturianu na educación y n’otros ámbitos ye pa esta organización “la declaración d’oficialidá, a la que la FSA-PSOE, partíu de gobiernu, vien negándose”. Nesi sen recuerden que “ye esa falta d’estatus d’oficialidá del asturianu lo que provoca que la Llei Wert nun considere al asturianu, non al revés”. La organización demanda al gobiernu asturianu que «nun malipule a la xente».