María Xesús Varela y Xose Nel Riesgo van presentar esti sábadu 14 d’ochobre a les doce y media la mañana na Llibrería Asturiana de Trabe, na cai Padre Buenaventura de Paredes, núm 4 d’Uvieu, l’últimu llibru de David M. Rivas que tien por títulu ‘Xente de Perende’. La obra, que cuenta col prólogu del desaparecíu Xose Álvarez, Pin, recueye setenta y cuatro histories narraes cola sutil ironía asturiana y l’axilidá de los contadores populares.
David M. Rivas nació en Xixón en 1957. Ye profesor titular d’Estructura Económica na Universidá Autónoma de Madrid, onde imparte les materies d’Estructura Económica Mundial y de Desarrollu Sostenible. Ye profesor y investigador de varios centros d’Europa y America y miembru del Club de Roma, que busca la promoción d’un crecimientu estable y sustentáu de la humanidá. Fue Secretariu Xeneral del Ateneo de Madrid (1989-1995) y presidente d’Amigos de la Tierra (1993-1997).
Ye miembru de l’Academia de la Llingua Asturiana desde 1993 y candidatu d’Andecha Astur a la presidencia del gobiernu d’Asturies en 1999 y en 2003, amás d’al Senáu español en 2000. Fue’l candidatu d’Andecha Astur nes elecciones europees de 2004 ocupando’l puestu 17 de la llista de la coalición Europa de los Pueblos, y nuevamente ratificáu como candidatu d’Andecha pa les elecciones del 2007.
Agora, cerca de cumplir los 50 años, y con una montonera de publicaciones academiques detrás, referíes a política económica, polo qu’en nada lu puen ayudar nesta que ye la so primer salida pública lliteraria, David M. Rivas sorprende a los llectores asturianos con una obra prestosísima. A la manera de les narraciones populares d’Álvaro Cunqueiro o los retratos de Josep Pla, David despliega tola so capacidá de síntesis, les sos dotes d’observador y la proverbial memoria que-y reconocen amigos y enemigos, pa facer un retratu entrañable d’homes y muyeres que son y se comporten como tales ondequiera s’alcuentren: na más remota braña, na emigración madrileña, nel exiliu o en Finlandia.
Esti llibru ábrese con un preciosu, fraternal y llargu prólogu de Pin el de Conceyu de Madrid, Xose Álvarez Fernández, l’últimu testu qu’escribió apenes unos díes enantes de morrer.