El Programa d’actividaes educatives nel Botánicu pal nuevu cursu escolar ya ye públicu. Los interesaos ya puen conocer visites ya itinerarios pa toles etapes educatives y nel que participen, cada añu, una media de 9000 escolares, de dientro y fora d’Asturies.
EDUCAR pa CALTENER ye’l principal oxetivu d’un programa col que’l Botánicu quier facilitar al profesor l’usu del equipamientu como recursu didácticu, onde contestualizar y poner en práctica’l so trabayu dientro de l’aula.
El Xardín Botánicu cuenta pa ello con unos recursos únicos que l convierten nun auténticu llibru abiertu sobro naturaleza, con colecciones y percorríos tematizados, la presencia d’un espaciu protexíu como la Carbayera d’El Tragamón y xuna singular museografía, tollo acompañáu de nuevos espacios y de recursos de sofitu pa entender el conteníu de les colecciones vexetales.
El programa ufierta visites xenerales y temátiques, visites técniques (pa grupos de Bachilleratu, Ciclos formativos y Universidá), ya itinerarios pa trabayar sobro’l tarrén conteníos concretos del temariu ya investigar en materies rellacionaes cola flora, la fauna, la biodiversidá o’l mediu ambiente. Nesti cursu, hai nuevos itinerarios nos que s’incorporó l’usu d’aplicaciones dixitales pal so desenvolvimientu.