CUPA felicita a la Universidá por poner en marcha cursos d’asturianu

El Conceyu Universitariu pol Asturianu (CUPA) celebró la puesta en marcha de los cursos d’asturianu dientro de la Casa de les Llingües de la Universidá d’Uviéu. L’acción supón pa la organización universitaria “el cumplimientu d’unu de los puntos importantes de los alcuerdos ente l’equipu rectoral y el CUPA”.

El CUPA felicitó yá a la Directora de la Casa de les Llingües, Marta Mateo Martínez-Bartolomé y al propiu Rector pola puesta en marcha de la iniciativa y anima a tolos alumnos de la Universidá y al públicu en xeneral (al que tán abiertos estos cursos) a participar d’ellos.

Reglamentu de Doctoráu

En cuantes a otra de les reivindicaciones que tán nesti momentu en procesu, la cuestión del Reglamentu de Doctoráu, el CUPA anunció que va aconceyar col Rector a lo llargo de los próximos díes “pa conocer la solución definitiva que va dase al Reglamentu de Doctoráu, pa que permita la realización y presentación de tesis n’asturianu, lo que col borrador actual nun sedría posible”.

El Conceyu recuerda que “son cientos les persones que se sumaron a esta reclamación del Conceyu Universitariu pol Asturianu nos últimos díes, incluyendo a l’Academia de la Llingua Asturiana, partíos políticios, asociaciones…” y por ello tán seguros “de qu’hai un verdaderu consensu na sociedá asturiana pa que cambie esta situación de marxinalidá pa la llingua asturiana”. Una negativa que nos últimos años provocó enfretamientos ente la Universidá y los sos alumnos nos tribunales.