Hixénicu Papel estrenó esta fin de selmana “Cuartetu”, representadaesti sábadu en Xixón nel teatru Xovellanos a les 20.30 hores. L’espectáculu, premiu “Xovellanos” a la producción escénica de 2021, cuenta con Cristina Puertes como acompañante de Alberto Rodríguez nel repartu y embaxu la dirección de Laura Ilesia.
Inspirada en “Les Amistaes Peligroses”, de Choderlos de Laclos, “Cuartetu” preséntase como un duelu dialécticu que tresllada emociones como pasión, amor, odiu, destrucción, prestar, muerte, intelixencia o crueldá.
En “Cuartetu” participen los músicos Cristina Gestido (viola) y Mario Bernardo (pianu). “Ye un espectáculu grande y complicao, pero bien guapu de faer. La resultancia ye bien interesante”, confiesa Alberto Rodríguez.
“Toi seguro que nun va dexar indiferente a naide. El testu ye bien duru, con imaxes bien poderoses”, enfatiza l’artista asturianu, conocíu pola so faceta televisiva, pero que defende’l papel del teatru profesional, y estima la oportunidá del premiu “Xovellanos” pa poder desenvolver una propuesta de caláu.