Acaba convocase la VI edición del Concursu Semeyes LA SIDRA, pa obres rellacionaes cola sidra, la mazana y los sos derivaos. Trátase d’un concursu abiertu a profesionales y aficionaos, que nesta VI edición perfila daqué más les sos bases al oxetu de meyorar la convocatoria, y p’asegurar que los ganaores pasen a recoyer los premios.
Comu se remembrará, a l’anterior edición presentárense 145 fotógrafos con 563 semeyes, lo que supunxo tou un ésitu de participación, por nun falar de l’alta calidá de les obres presentaes.
Los premios tan dotaos con:
– 600 pa la semeya ganadora (500 en metálicu y 100 en llibros).
– 350 pal segundu premiu (300 en metálicu y 50 en llibros).
– 150 (125 en metálicu y 25 en llibros) pal terceru.
Arriendes d’ello esti añu habrá un accesit p’aquelles semeyes que tean comu oxetu la Sidra J.R, patrocinador del Concursu y que consistirá en 2 caxes de botelles de sidra JR.