El voceru nacional de Compromisu por Asturies, Daniel Fernández, quixo treslladar esti día’l sofitu de la organización a toles movilizaciones que se tán llevando contra la LOMCE y el Ministru Wert, y especialmente a la xornada de fuelga del 24 d’ochobre, porque pa Compromisu por Asturies, la contrarreforma educativa que supon la LOMCE, tresllada los principios de la educación del sieglu XIX al sieglu XXI, asina movemos nuna educación pa los que tán predestinados a trabayar, onde namá hai asignatures de corte técnicu anulando toa parte de pensamientu críticu, aules masificadas, ensin sustitución de profesores, etc., y otra pa los que tienen que tomar decisiones nel futuru, claramente empobinada a ser realizada dende’l sector priváu.
Dende Compromisu por Asturies tamién quieren resaltar que la LOMCE ta dientro d’un ataque sistemáticu a la Escuela Pública, asina les xubíes de tases en FP y nes Universidaes, la vía d’amenorgar el fracasu escolar a base de la espulsión del sistema educativu de les y los estudiantes con más dificultaes, l’amenorgamientu de beques o les facilidaes pa la creación de nuevos centru alcordaos y privaos, formen parte d’un conxuntu de midíes empobinaes a liquidar de forma sistemática’l modelu educativu públicu.
Daniel Fernández concluyó llamando a la participación masiva na fuelga educativa convocada pal 24 d’ochobre, coles mires de demostrar que más allá d’una mayoría absoluta, el PP nun cunta con nengún tipu de sofitu dientro de la comunidá educativa, nin de profesores, nin d’alumnos nin de padres.