Colunga convoca’l IX Certame de Gaita Asturiana “El Gaiteru Llibardón”

L’Asociación Cultural “San Roque” de Llibardón y la estaya de Cultura del Ayuntamientu de Colunga convoquen conxuntamente esta nueva edición del Premiu “Gaiteru Llibardón”, que va celebrase na plaza Chile de la llocalidá de Llibardón, el vienres 7 d’agostu. El Certame inclúi dellos premios tanto pa categoríes infantiles, como pa la de gaiteros adultos.

Nel certame, que tien por modalidá única la gaita asturiana, puen participar toles persones, dixebraes en Categoría Infantil, hasta los 14 años y Categoría Xoven y Adultu, de magar los 15 años. En caúna d’elles van poder participar un máximu de 12 gaiteros, per orde d’inscripción.

El plazu p’apuntase termina’l 31 de xunetu, teniendo d’abonar un depósitu caún de los participantes de 5 euros pa los infantiles y 10 pa la categoría adultos, nel númberu de cuenta del Caxastur de Colunga 2048.0046.98.0300045978 col conceptu Certame de Gaita Asturiana.

La Organización comprométese a devolver estos importes a los participantes una vez finalice’l concursu. En casu de producise dalguna baxa, devolveráse tamién el dineru, siempre y cuando se comunique enantes del 31 de xunetu.

La inscripción formalízase personalmente o unviando per corréu la solicitú a la Casa Municipal de Cultura de Colunga, asitiada na plaza l’Ayuntamientu d’esta llocalidá. Tamién pue mandase al corréu lletrónicu cultura@colunga.es

Particípase con dos temes llibres, almitiéndose composiciones propies. El xuráu va dase a conocer el mesmu día del Certame, y va entregar trés premios por cada categoría, de gaita de construcción tradicional, 60 euros y troféu, y 30 euros y troféu pa los infantiles; y una gaita asturiana fecha por Vicente Prado “El Pravianu”, 150 euros y troféu y 100 euros y troféu pa los adultos.

El gaiteru más mozu, dientro o fuera de concursu, va recibir una reconocencia.