El grupu británicu de rock Coldplay promociona nun vídeu espublizáu esti xueves pasáu l’actividá de la ONG maltesa Migrant Offshore Aid Station (MOAS) a favor de la busca y rescate d’inmigrantes y abelugaos nel Mediterráneu.
Los integrantes de la banda anunciaron que sofiten el trabayu de MOAS, una de les organizaciones que trabayen nesi mar nel salvamentu de persones qu’intenten cruciar dende África a Europa, y que se converten en “patrocinadores al llargu plazu” de la ONG.
L’anunciu del sofitu de Coldplay conocióse al traviés de MOAS de la que esta organización presentó un vídeu tituláu ‘Rescue Humanity’ nel que Chris Martin canta una versión del ésitu de la banda Don’t panic.