Los museos del Prau, Reina Sofía o Thyssen, los d’Arqueoloxía y Antropoloxía, y la Biblioteca Nacional d’España (BNE), toos ellos en plenu corazón de la qu’agora ye la capital española del coronavirus en cuantes que mayor zona de riego, cierren les sos puertes dende mañana xueves “y hasta nuevu avisu”. La midida adóptase naturalmente para evitar andaes y tien como importante esceición la continuidá de los potentes servicios dixitales y virtuales de les instituciones.
“Siguiendo’l paquete de midíes adicionales anunciáu pol Conseyu de Ministros en “zones d’alta tresmisión” del Covid-19, el Ministeriu de Cultura, en coordinación col de Sanidá, “decidió adoptar una serie de midíes col fin de garantizar la salú de visitantes, usuarios y trabayadores” de les instituciones culturales dependientes del Estáu.
Eses midíes consisten básicamente na suspensión temporal de les actividaes de cara al públicu” de tolos centros concerníos. Y afecten, amás d’a les entidaes citaes, al Cine Doré y la biblioteca de Filmoteca Española, los museos Sorolla, Cerralbo, d’Artes Decoratives, d’América, del Romanticismu y Centru Tabacalera.
Tamién suspenden la so actividá abierta al públicu’l Centru de Caltenimientu y Restauración de Filmoteca Española y los dos arquivos de titularidá estatal allugaos na Comunidá de Madrid: l’Arquivu Históricu Nacional y l’Arquivu Xeneral de l’Alministración, que s’atopa na localidá de Alcalá de Henares.
Según la nota oficial de Cultura, esta midida “ta suxeta a la evolución d’esta situación estraordinaria” que vivimos y ye “susceptible de ser suspendida o modificada según les directrices de les autoridaes sanitaries”.
Como ye obvio, les cuentes que les distintes entidaes tienen en Facebook, Twitter y Instagram caltiénense operatives y van informar –lo mesmo que les webs institucionales– de cualquier cambéu que se produza al respeutu.
Nel casu de la Biblioteca Nacional, los sos responsables quixeron precisar que “toos les canales d’información dixital de la institución, ente los que destaquen el so catálogu y los distintos portales dixitales (Biblioteca Dixital Hispánica y Hemeroteca Dixital), van caltenese operativos al traviés de la páxina web”.