Dos cares de la emigración, a debate. Alredor d’un cientu de xóvenes descendientes d’asturianos participarán, a partir del xueves, nel Primer Alcuentru de Mocedá pola Asturianía, que se cellebra na llocalidá arxentina de Mendoza con participantes de siete países y dos grandes asuntos pa discutir: la situación de los fíos y nietos d’asturianos en Llatinoamérica y la nueva emigración de xóvenes qu’abandonen anguaño’l Principáu.
Pa llevar a bon puertu les discusiones de la xuntanza, que se prollongará hasta’l llunes 24 de xineru, dos representantes del Conseyu de la Mocedá del Principáu d’Asturies y una tercera procedente’l Centru Asturianu d’Alcobendas, en Madrid, viaxarán a Arxentina pa presentar ponencies qu’ayuden a enveredar el discutiniu.
De Mendoza, los miembros de la embaxada asturiana desplazaránse a la llocalidá chilena de Valparaíso con un doble envís, entrega-y el premiu del concursu de relatu entamáu pola asociación Les Filanderes a la so ganadora, que reside en Chile, y facer lo propio cola orla’l primer cursu de llingua asturiana que s’impartió nel centru asturianu de Valparaíso.
El director de l’Axencia Asturiana d’Emigración, Luis Miguel Fernández Romero, presentó esta mañana’l conteníu del alcuentru xunta la presidenta de Les Filanderes, Asunción Naves, y ún de los representantes del Conseyu de la Mocedá que viaxará a Arxentina, Pablo Prieto.