Los alumnos de terceru de la ESO del Institutu Rei Pelayo de Cangues d’Onís van participar nuna charra sobre la llingua asturiana qu’organiza Iniciativa pol Asturianu por petición del profesor del centru, Fonsu Martín, esti vienres 31 de mayu de magar les 12:25 hores. Na charra, espliquen, “falaráse colos alumnos de la situación del asturianu y de la so visión como alumnos matriculaos na asignatura”.
A esti actu súmase otru que va celebrase yá pela tarde-nueche nel chigre Filandón de Cangues, onde va presentase’l númberu 11 de la revista Formientu con un recital d’autores mozos y una presentación de la organización nel conceyu, a partir de les ocho de la tarde.