Celestina Cá Sanchu d’Ambás protagoniza un discu cola collaboración del so ñetu, Xosé Ambás

L’Archivu de la Música Tradicional del Muséu del Pueblu d’Asturies ta acabante d’espublizar l’octavu discu de la serie ‘Fontes sonores de la música tradicional asturiana’. Un discu nel que ye protagonista Celestina Cá Sanchu d’Ambás, la güela del etnógrafu Xosé Ambás.

Celestina Cá Sanchu d’Ambás tien ochenta y cinco años y el repertoriu ta conformáu por 32 temes vocales au apaecen dances, la ronda, la xota, la muñeira, el cantar de boda, cantares de neños etc, anque según cuenta’l propoi Ambás “la mayoría son sones pa la danza”.

Amás, cuenta l’etnográfu que “You canto dellos estribillos ya dellas cuartetas chando-y un gavitu”. La presentación va facese’l sábadu qu’entra día 13 a les 13 hores nel pueblu d’Ambás, en Grau y va ser un homenaxe a Celestina au nun va faltar bon quesu, pan y vinu’l País. Tampoco va faltar la música tradicional de tolos convidaos que lleven l’istrumentu y de xuru que Celestina “tamién echará unes cantaruxaes, ta tola xente convidada” diz Ambás.