Carlos Suari presenta l’Atles de los Bolos Asturianos en Villaviciosa

Suburbia Ediciones, qu’asoleya esta obra, presenta l’Atles de los Bolos Asturianos de Carlos Suari esti sábadu 15 d’avientu a les 12 la mañana nel Atenéu Obreru de Villaviciosa. Nel actu van participar, amás del autor, y la editora, Silvia Cosío, el Presidente de la Federación Asturiana de Bolos, José Desiderio Díaz López. Dempués del actu fadráse una amuesa de bolos na bolera del Atenéu.

L’Atles de los Bolos Asturianos (ABA) ye un proyectu de Carlos Suari, llicenciáu en Ciencies de l’Actividá Física y del Deporte con estudios n’Antropoloxía Social y Cultural, y consideráu etnógrafu especializáu nel patrimoniu lúdico-motor y la so aplicación a la enseñanza. Nél, l’autor afonda nos raigaños culturales de los xuegos de bolos n’Asturies, aprovechando pa facer un rastrexu del repertoriu, replantiando variables y clasificaciones de dalgunes investigaciones previes.