Diez canciones inédites, La Capitana y Sardinera de Xixón conformen el nuevu discu de Carlos Rubiera, un discu temática llocal pero espirítu universal. El nuevu trabayu discográficu del cantautor xixonés presentóse ayeri martes al meudía nel Antiguu Institutu Xovellanos de Xixón cola presencia de dalgunes autoridaes y númberoses personalidaes del mundiu de la cultura asturiana, ente los que taben Ramón d’Andrés, Carmen Rua, Mercedes Álvarez…
Rubiera entamó escusándose pola falta de presentador pal actu, énte lo que Daniel Rodríguez, periodista de la Cadena Cope en Xixón, llevantóse pa dicir una pallabres improvisaes sobre la figura de Carlos Rubiera, nes que desveló que conoció pola so amistá común con Xulio Ramos yá nel añu 1972 y al que dende entós vien escuchando, según dixo. Carlos continuó la presentación falando de la so yá llarga carrera musical y de les circustancies que lu llevaron a grabar esti discu, ‘Dempués de tener preparáu un discu cola versión asturiana de delles pieces llíriques de los grandes clásicos europeos y ver que les bones pallabres de les autoridaes quedaben namás que n’eso, decidíme a grabar un discu coles pieces sobre Xixón qu’escribiere nos últimos años’.
Rubiera destacó na presentación, como Xixón fuere y ye una temática mui recurrente pa los artistes y nomó a dalgunos de los autores más conocíos, como Pachín de Melás, Piñole, Marola, Alfonso Camín, El Presi, Xuan Xosé Sánchez Vicente como exemplu d’ello. Canciones de Xixón ye según el propiu autor ‘un trabayu sorprendente’ y ye que Rubiera afirmó que siempres-y presta sorprender a los sos siguidores con coses nueves ‘Agora qu’anunciare un discu llíricu y esperaben daqué más asemeyao a Viaxe al silenciu (el so anterior discu), faigo esti discu de canción llixera, préstame dexalos desorientaos’.
El diseñu de la caratula ye de Manuel Asur y ta pensáu ‘pa llegar a los turístes que vengan a Xixón, a los propios xixoneses y sobre too, a los nuevos emigrantes asturianos, a los que dedico una canción qu’espero que se convierta nel so himnu: Buscando’l norte’. Inclúi un llibretu coles lletres y l’interior ta decoráu con semeyes del Xixón d’enantes.
Carlos Rubiera tuvo un recuerdu mui especial pa los miembros de Felpeyu que perdieron la vida esta selmana pasada y pa los superviviente: ‘N’Asturies reconozse más la muerte que lo que se faiga en vida, dalgún día pondránme a min una cai, pero mientres que viva tendránme igual d’escaecíu, como diz mio ma: A burru muertu, la cebada al rau’.
L’actu terminó cola escucha de dellos temes d’esti trabayu nos que podemos atopar dende una canción de tonada hasta un regee o un tangu. Un discu que cuntó con dalgunos de los meyores músicos d’Asturies pa la so realización y que supón la vuelta de Carlos Rubiera a una música más popular, pero como siempres, cola calidá que-y pon la que munchos consideren la voz más importante del Surdimientu.