Esti vienres, día 9 d’abril, a les 19:30, nel Salón d’Actos del Centru de Cultura Antiguu Institutude Xixón, va tener llugar l’actu de presentación de la triloxía “30 ASTURIANAES” (llibru + 3 CDs), del cantante y compositor xixonés Carlos Rubiera.
Tratase d’una obra qu’abre camín al necesariu procesu de renovación de la tonada tradicional o asturianada, partiendo del legáu de los grandes clásicos del xéneru que llevaron la tonada tradicional al terrén de la música culta nes primeres décades del S. XX (Rodríguez Llavandera, Baldomero Fernández o Manuel del Fresnu, ente otros).
En “30 ASTURIANAES” Carlos Rubiera interpreta tanto cantares del repertoriu tradicional d’asturianada como composiciones propies en música y lletra, con un tratamientu instrumental que toma diversos formatos: dende’l lied clásicu (composiciones pa voz y pianu) hasta pieces más cercanes al nuevu folk, pasando por temes a capella, o con acompañamientu de gaita.
“30 ASTURIANAES” presentase en formatu llibro (qu’inclúi les lletres de tolos cantares y diversos testos esplicativos, del autor, del editor y del musicólogu Llorián García Flórez) xuntu con trés CDs.
En total, la obra consta de 30 pieces cantaes, más trés pieces instrumentales pa gaita; y pa la so grabación Carlos Rubiera cuntó cola collaboración d’un estraordinariu elencu de músicos y cantantes, ente los que s’atopen nomes tan destacaos como los gaitertos José Angel Hevia, Xuacu Amieva, Flavio Rodríguez y Llorián García; les voces de Mariluz Cristóbal Caunedo, Rafa Lorenzo y Almudena López (Cantabria); la percusionista María Hevia; l’acordionista María Álvarez y los pianistes Gabino Antuña y Óscar Camacho, ente otros nomes destacaos de la música asturiana actual.
Nel actu d’esti vienres día 9, el públicu asistente va poder escuchar una pequena amuesa del repertoriu incluyíu en “30 ASTURIANAES”, n’audición comentada por el mesmu autor, con quien va poder dialogar nel coloquiu final. Amás, les persones que lo deseyen van poder adquirir exemplares de la obra a un preciu especial.