Facía 3 años que Capercaillie nun pasaben por Lorient y paez que foi ayeri cuando lo ficieron. La misma fuercia, la mesma calidá, la mesma intensidá y la mesma dedicación, con una plantel d’invitaos enforma interesante y un públicu que persabe agradecer detalles como los que se-y ufrieron na nueche del martes en Lorient, depués de que Corquiéu ficiera de aperitivu más qu’interesante.
Karen Matheson tornó a brillar cola so personalidá perconocida, pero los años nun pasen de baldre, magar la so voz siga como siempre. Donald Shaw sigue faciendo del curdión una caxa máxica y Charlie McKerron fai col vigulín lo que-y pete y mucho más si tien a los collacios de Session A9, ún de los grupos escoeces d’anguaño de mayor consideranza nel panorama musical, al llau.
Si amás cuntes cola fondura sonora de la gaita irlandesa o la flauta en si bemol de Michael McGoldrick detrás, maestru gaiteru y flautista autor de trabayos tan conocíos como ‘Fused’ y ‘Wired’, poco más se necesita pa facer feliz a un públicu volcáu que salta como llocu en cuantes que-y toques un reel.
Un conciertu de más d’una hora y media, con Corquiéu de teloneros, nun pue ser sinon una nueche inolvidable, como la fuere la del martes nel Espace Marine de Lorient.