“Facer normal a nivel institucional lo que yá ye normal na cai”. L’Ayuntamientu de Cangas del Narcea entama, con esi propósitu declaráu, la creación d’un serviciu propiu de normalización llingüística que, a propuesta de los socialistes llocales, plantega dotar al municipiu d’un serviciu permanente de torna al asturianu, señalización nesa llingua y un plan pa implicar a les entidaes privaes.
Nuna nota de prensa difundida güei, l’Ayuntamientu de Cangas reconoz que l’asturianu ye una llingua viva nel so territoriu, falada polos ciudadanos, y poro plantega la creación d’un serviciu asemeyáu a los que yá funcionen en Xixón, Llangréu, Mieres y la Mancomunidá’l Cabu Peñes pa “esplicitar” esa realidá que l’idioma tien na cai.
Na mesma comunicación pública, l’Ayuntamientu de Cangas del Narcea anuncia la so voluntá de recuperar dafechu la toponimia tradicional del conceyu, “cola dificultá” d’esti llabor nun municipiu qu’inclúi cerca de 300 núcleos de población y con 800 quilómetros cuadraos, y axúntase a la llista de conceyos que soliciten l’acción de la Xunta Asesora de Toponimia del Principáu.
Los responsables del Ayuntamientu de Cangas xustifiquen esta segunda llinia d’actuación na necesidá de reconocer alministrativamentelos usos idiomáticos que yá tán presentes na población. “Asina, si habitualmente decimos ‘Pixán’ por ‘Peján’ o ‘Chadréu’ por ‘Ladredo’, nun vemos por qué estes espresiones nun van ser igualmente válides pa l’Alministración”, argumenten.