Candás va celebrar la IV Selmana de la Cultura Astur

El Grupu de Baille Tradicional San Félix vieno acabante de facer públicu’l programa de la IV Selmana de la Cultura Astur, que va celebrase en La Baragaña (Candás) los díes 10 y 11 de payares. L’actu va cuntar con un amagüestu popular y la II Feria del Discu y el Llibru n’Asturianu. Nesta feria van presentase munches de les novedaes lliteraries y musicales d’esti añu 2007.

El día 10 a les seis de la tarde va entamar esta II Feria del Discu y del Llibru n’Asturianu cola presentación del númberu trés de la revista lliteraria Formientu, que ta dedicada a la lliteratura erótica de los escritores más mozos. Media hora más tarde Xurde Fernández va presentar el llibru Volver, espublizáu pola editorial Ámbitu. A les siete va acutar el grupu Xentiquina pa los neños del conceyu.

A les ocho la tarde va presentase Vía de Serviciu, el primer llibru de la Editorial Suburbia y a les ocho y media, Pablo Texón, Sergio Camblor y Pablo X. Suárez van facer un llectura de poemes. A les nueve la nueche va pesllase’l día cola actuación del dúu Mestura, qu’anguaño promociona’l discu ‘Agua del norte’.

Yá’l día 11, a les seis menos cuartu, repite Mestura, pero esta vegada pa los neños, cola actuación y los ‘Poemes de carambelu’ de Marisa y Luis. A les seis y media preséntase la revista Remanecer, que llega yá al so segundu númberu. A les siete, Alberto Álvarez Peña presenta la Guía de la Mitoloxía Asturiana, de la Editorial CH. Los actos de pieslle d’esta IV Feria va centrala la presentación del tercer númberu de la revista ‘El Cuirno’ a les siete y media y un conciertu de música tradicional a les ocho la nueche. Dos díes nos que Candás va convertise na capital de la música y la lliteratura n’asturianu.