El vienres 23 d’abril a les 20h. nel local cambalache, preséntese l’informe Para el que quiera oir. Voces dende y contra los Centros d’Internamientu d’Estranxeros, realizáu pol Ferrocarril Clandestín, Médicos del Mundu y SOS Racismo Madrid.
Voces dende y contra los Centros d’Internamientu d’Estranxeros ye una güeyada al interior del CIE d’Aluche de Madrid, al traviés de los testimonios en primer persona de migrantes que fueron recluídos nesti centru. Un altavoz pa toes aquelles persones que pasaron por esta esperiencia y que nun tuvieron la oportunidá de denunciar la situación que vivieron. La realidá descubierta tres los murios d’esti centru fixo plantegar la necesidá de denunciar públicamente la so esistencia y visibilizar el día ente día de les persones ellí reteníes al traviés d’esti documentu. Recoyéronse más de cuarenta testimonio grabaos y transcritos pa esti fin. Estes son les sos voces. Esti informe, frutu del trabayu colectivu del Ferrocarril Clandestín, SOS Racismo Madrid y Mélicos del Mundu Madrid, pretendi ser un preséu de denuncia de les condiciones y la sistemática vulneración de derechos nestos centros, lo mesmo que de la violencia estructural implícita na so esistencia y nel actual réxime de fronteres.