CaleyAvilés 2016 ye un ciclu d’actividaes pal branu entamaes pola Estaya de la Llingua del Conceyu d’Avilés que llega esti xueves 29 a la so fin con una visita pel cascu hestóricu.
La iniciativa que fina ufrió la posibilidá de facer una riestra visites guiaes en llingua asturiana a los entornos naturales y urbanos de la villa y la redolada. Nesta primer edición fixéronse tres visites: el 29 de xunetu a la playa de San Xuan, dunes de L’Espartal y charca de Zeluán (12 participantes); el 29 d’agostu al Parque Ferrera (34 participantes); y la d’esti 29 de setiembre pel cascu históricu de la ciudá (44 inscritos).
Les visites, nes que participaron persones d’Avilés y d’otros conceyos d’Asturies, sobre manera d’Uviéu y Xixón, tuvieron qu’ampliar el númberu de places, polo que pal añu 2017 ta asegurada una segunda edición de CaleyAvilés. Ye de reseñar que’l programa surdió depués del ésitu de les dos visites feches nel 2015 al Parque Ferrera y la que s’entamó en mayu del 2016 nel Muséu de la Historia Urbana d’Avilés, que coincidió col Día Internacional de los Museos.