Biblioteques Públiques d’Asturies asoleya’l númberu 8 de la revista “Biblioasturias”

Dende va unos díes ta disponible nes biblioteques y cases de cultura del país el númberu 8 de “Biblioasturias”, la revista de les biblioteques públiques d’Asturies editada pola Conseyería de Cultura y Turismu y qu’inclúi entrevistes, reportaxes, reseñes de llibros, amás de noticies y datos sobre les biblioteques asturianes. Nesti númberu apaez un artículu de Félix Parajón Fernández, psicólogu y bibliotecariu del Conceyu de Nava, sobre la llectura y la motivación, una entrevista a María Teresa Álvarez y la sección “A tres bandas”, nesti casu ente los presentadores de la TPA Sonia Fidalgo, Pedro Durán y Alberto Rodríguez.

No que cinca al asturianu, la revista inclúi, na sección “La biblioteca de la mio vida”, un testu del escritor José Luis Renduele. Amás Xandru Fernández y Berta Piñán respuenden a un mesmu cuestionariu sobre lliteratura y llectures y faise un repás peles novedaes editoriales n’asturianu, reseñándose “La mirada aliella”, d’Antón García; “El país del silenciu”, de Vanessa Gutiérrez y Beatriz R. Viado; “Los araxales de la vida”, de Xulio Viejo y “El murmuriu d’un mieu ensin nome”, de Rubén Sánchez Antuña. Tamién se fala del llibru infantil «Pa qué val una escoba?», d’Enrique Carballeira, y de los discos «Amor amante», de Lafu & Rebeca Velasco, y «Echaos a la mar», de Skama la Rede.