El cineasta Juan Antonio Bayona aseguró esti día que Jurassic World 2, remortina de la cuarta película más taquillera de la hestoria, va ser “más escura y terrorífica” que la so predecesora.
“Va Ser una película más escura y terrorífica que l’anterior”, afirmó’l director español mientres una entrevista con Efe pol estrenu de “Una bisarma vien veme”, que va llegar a la cartelera estadounidense n’avientu. “Evidentemente, cuando tienes a Chris Pratt tamién va ser bien risondera. Pero sí que va ser más escura: ye un segundu pasu nuna triloxía, y nel segundu pasu siempres escurez, como en ‘The Empire Strikes Back’ o ‘The Wrath of Khan’, que son los exemplos que siempres se ponen”, indicó.
“Nesi sentíu”, abondó, “la película lleva la hestoria onde nunca la llevaron antes. A mi sosprendióme enforma. Vamos a sitios onde la saga nun hai tao nunca antes, y, al empar, tamos rindiéndo-y homenaxe a la franquicia. Vamos dar un pasu más allá”. Coles mesmes, aseguró que “hai coses que van pasar que la xente nun s’espera y que realmente son chocantes”.
“Jurassic World” (2015), protagonizada por Chris Pratt y Bryce Dallas Howard, recaldó 1.670 millones de dólares en tol mundu y ye la cuarta película de mayor recaldación na hestoria. Ta previstu que “Jurassic World 2” llegue a la gran pantalla en xunu de 2018.