Bases del I Certame de Microrrellatos Mozos «Formientu »

I Certame de Microrrellatos Mozos «Formientu » Bases

Yá dixo Baltasar Gracián que lo bono, si breve, dos veces bono; y asina ye que los bonos rellatos cunten muncho más que la suma de les sos palabres. Nuna llinia pue caber una vida entera y hasta un universu, como nos cuenta’l microrrellatu más famosu del mundu hispánicu: “Cuando esconsonó, el dinosauriu entá taba ellí”. Otramiente, una sola frase al entamu d’una novela o cuentu ye fundamental p’afitar el tonu y l’ambientación d’una narración, como amuesen les noveles más sonaes de la lliteratura universal: Ana Karenina, Orguyu y prexuiciu, La Rexenta, Cien años de soléda… La escritura de microrrelatos mínimos ye un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia.

Col envís d’afalar la creación lliteraria ente los escritores más mozos y ayudalos a esplorar les sos posibilidaes l’asociación Xareos! y la revista Formientu, en collaboración cola editorial La Cruz de Grau, convoquen la primer edición del Certame de Microrrellatos Mozos «Formientu», según les bases que van darréu:

1.- Nel Certame puen participar toes aquelles persones nacíes de 1975 n’adelantre, con un númberu ilimitáu de microrrellatos.

2.- La tema de los microrrellatos ye llibre dafechu.

3.- Los rellatos tienen d’escribise n’asturianu, respetando les normes de l’Academia de la Llingua Asturiana.

4.- El llargor máximu de los rellatos ha ser d’ochenta caracteres (aproximadamente una llinia de procesador de testos a tamañu de lletra 12) cuntando espacios, apóstrofos, guiones, puntos y comes.

5.- Los rellatos han unviase al corréu lletrónicu formientu@xareos.com enantes del 31 d’agostu de 2009, unviando los datos personales (nome, teléfonu, dirección y curriculu curtiu) nun archivu axuntáu al corréu.

6.- El xuráu va tar formáu pol Direutor y los miembros del Conseyu de Redaición de la revista Formientu.

7.- D’ente los rellatos recibíos van otorgase trés premios (compuestos por un llote de llibros y la espublización del rellatu na revista Formientu) y un númberu ilimitáu d’accésits, que van espublizase na revista. El certame pue quedar ermu.

8.- Presentase al certame implica l’aceptación de les presentes bases.