Keira Knightley ye la favorita pa protagonizar el biopic sobre Catalina la Grande. La protagonista de Pirates del Caribe trabayaría a les ordes de Barbra Streisand que va ser la encargada de dirixir esta película sobre la monarca rusa.
L’actriz atópase axustando la so participación na cinta dende’l pasáu añu, según The Hollywood Reporter, qu’asegura que les conversaciones tán avanzaes. El proyectu ta basáu nun guión de Kristina Lauren Anderson qu’en 2014 formó parte de la famosa Black List de Hollywood, qu’axunta los meyores llibretos que nun se producieron.
La película va llevar a la gran pantalla la vida de Catalina la Grande, la emperatriz que más tiempu gobernó en Rusia. La hestoria va siguir a la nueva soberana mientres s’atopa atrapada nun matrimoniu abusivu col ineptu emperador Pedro III y cómo, finalmente, llogra llegar al poder utilizando la so intelixencia y astucia.
El próximu proyectu de Kinghtley va ser Collateral Beauty, una película na que va trabayar al pie de Will Smith, Kate Winslet, Helen Mirren y Edward Norton. La cinta tien previstu’l so estrenu n’avientu d’anguaño. L’actriz tamién va participar en Candy Store, un thriller protagonizáu por Robert De Niro que va llegar a les sales en 2017. La última vegada que viéramos a l’actriz na gran pantalla foi en Everest, una hestoria basada en fechos reales sobre unos alpinistes que traten de sobrevivir mientres una nube nel picu más altu del mundu. La cinta cuntó con Jason Clarke, Josh Brolin y Jake Gyllenhaal.
Knightley ye una de les cares más habituales del cine de dómina nel Hollywood actual. L’actriz británica atropa títulos como Anna Karenina (2012), Un métodu peligrosu (2011), La duquesa (2008), Expiación (2007) y Arguyu y prexuiciu (2005).