Abierta la matrícula la selmana pasada, Avilés ufierta 120 places gratuites pa mocedá nos campamentos urbanos de branu “CUJA” Les actividaes d’ociu van desenvolvese en cuatro veces del 4 al 29 de xunetu nel Colexu Públicu Marcelo Gago, de 10 a 15 hores de llunes a vienres. Pueden participar mozos y moces que nacieren ente 2006 y 2010 y tengan empadronamientu n’Avilés.
Tratase d’un proyectu formativo y participativo de dinamización del ociu y tiempu llibre dirixíu a l’adolescencia, cuantimás a moces con menos oportunidaes; un proyectu que parte de les necesidaes percibíes pola mesma mocedá y constrúyese poniendo en marcha les sos propies iniciatives, al traviés de les cualos vanse trabayando distintos valores que contribúin al so desenvolvimientu personal y social. Va dexar que mientres les mañanes del mes de xunetu, les y los mozos con edaes ente los 12 y 16 años, que por realidaes familiares tienen poques posibilidaes de realizar actividaes lúdiques y saludables, puedan esfrutar d’elles.
Cola puesta en marcha d’esti proyectu municipal adóptense midíes pa facilitar la conciliación efectiva de la vida llaboral, familiar y personal. Too ello coles mires de consiguir que madres y padres d’adolescentes con estes edaes tengan les mesmes oportunidaes de desenvolvimientu personal y profesional y puedan compatibilizar, en corresponsabilidad, cola vida personal y familiar.
Un añu más el llugar pal desenvolvimientu de l’actividá va ser el CP Marcelo Gago, pola so privilexada allugamientu ente los parques de La Ferrera y La Madalena, espacios óptimos pa la realización d’actividaes al campu. Van tener llugar n’horariu de 10:00 a 15:00 hores, de llunes a vienres, ya inclúin serviciu de comedor, tamién gratuitu, pa quien lo deseye.
La matrícula faise por rigorosu orde d’inscripción, hasta escosar el númberu de places. Van ser prioritaries les solicitúes de les persones que s’atopen en delles de les situaciones de vulnerabilidá señalaes nel apartáu terceru de la ficha d’inscripción.