La conceyalía de Polítiques Sociales del Ayuntamientu d’Avilés pon en marcha pal próximu 9 d’agostu un Serviciu d’Asistencia Virtual Conversacional al traviés d’un chatbot de Whatsapp.
La conceyala de Polítiques Sociales, Concepción Méndez, y la edil delegada de la área, Leticia González, presentaron esta selmana’l nuevu Serviciu d’Asistencia Virtual Conversacional basáu nun chatbot de Whatsapp pa facilitar l’accesu de la población a la información de los servicios sociales municipales y que se va poner en funcionamientu’l próximu 9 d’agostu.
Méndez esplicó qu’esti serviciu, pioneru n’Asturies, ponse en marcha col oxetivu “de nun dexar a naide atrás” y ye que, según esplicó la concejala, “el númberu de solicitúes d’información aumentaron de forma esponencial dende l’entamu de la pandemia”. Por ello la conceyalía empezó a trabayar “en nueves víes de comunicación más accesibles por que cualquier ciudadanu pueda aportar a la información de forma senciella y a los recursos sociales que pon en marcha’l Conceyu”.
Pela so parte, González, esplicó’l funcionamientu del serviciu: “tan solo mandando un “Hola” al WhatsApp 985 98 18 88 podrá aportase a información predeterminada o a un chat con servicios sociales. La información que puede consultase va dende información xeneral, descarga de solicitúes a accesos a la see electrónica o a les webs onde se llogra información más ampliada. El primer pasu, tres una presentación de los servicios sociales, ye amosar el consentimientu pa usar esti mediu de comunicación: namá’l Conceyu y l’empresa xestora del serviciu van rexistrar el númberu de teléfonu pa poder dar respuesta a les cuestiones plantegaes. Podrá consultase en base a un menú principal que parte de trés apartaos: 1. Centros 2. Consultes y 3. Chat con axente. Namái va ser necesariu’l númberu correspondiente p’aportar a información más detallada”.
La conceyala delegada de l’área remarcó qu’esti serviciu “nun sustitúi a personal de la conceyalía, sinón que los sofita nuna de les sos funciones principales. Curióse enforma los aspeutos d’accesibilidá, utilizando testos senciellos acompañaos por iconos, lo que nun ye baladí yá que favorez que persones con dificultaes na fala o na audición puedan aportar tamién a la información”.