El Conceyu d’Avilés y la Cámara de Comerciu van poner en marcha una Oficina de Promoción d’Avilés como Destín de Congresos. L’alcaldesa Mariví Monteserín y el presidente de la Cámara de Comerciu, Francisco Menéndez, presentaron públicamente hai unos díes esta nueva iniciativa, na que va participar como axente collaborador-consultivu l’asociación “Avilés Club d’Empreses”.
L’alcaldesa esplicó que “surde col retu de desenvolver un trabayu conxuntu que suma la esperiencia, capacidaes y el saber faer de dambes instituciones pa diseñar un programa que dexe convertir Avilés nuna nueva referencia de turismu de congresos del norte d’España. Vamos a por toes”.
Monteserín destacó que “tenemos una estratexa perbién definida sobre’l tipu de tamañu de congresos que queremos atraer a Avilés, qu’esperimentó una importante crecedera mientres los últimos años”. Esplicó que l’afitamientu d’Avilés como ciudá de congresos basase nuna Proyección turística alcanzada con equipamientos que singularicen y estremen la ciudá.