Músiques tradicionales de países como Arxentina, Venezuela o Bolivia van sonar nes voces y preseos de cuatro agrupaciones que tamién van interpretar pieces de tradición local esti sábado n’Avilés.
El Grupu de Cantar Amigu de Miranda, col patrociniu del Conceyu d’Avilés, entama’l V Alcuentru de Cantar “MirandAmérica”: un festival que quier celebrar, per mediu de la música, les relaciones históriques y presentes ente’l conceyu y Llatinoamérica.
Na cita van participar cuatro agrupaciones: “Raigaños del Sonkoy”, el Coru de la Bodega de Candás, “Vuelta Embaxo” y el mesmu Grupu de Cantar Amigu de Miranda.
El tríu “Raigaños del Sonkoy” va interpretar cantares con denominación d’orixe arxentín, cubanu, venezolanu y chilenu. El Coru de la Bodega de Candás va faer una amuesa del so repertoriu más habitual y popular con cancios como “La Candasina” o la “Sardinera”. “Vuelta Embaxo”van devolver la mirada a América con un repertoriu con sabor venezolano, arxentín y bolivianu a partes iguales.
El festival va empecipiar a les 19,30 hores del sábadu 10 d’ochobre, nel auditoriu de la Casa Municipal de Cultura. N’este mesmu llugar podrán adquirise les entraes al preciu de 5 euros, los díes 9 y 10 d’ochobre, de 18 a 19,30 hores.