asturnet

Dende l’asociación N’ast denuncien como nos tiempos caberos la empresa de tresporte públicu xixonés, EMTUSA, “sustitúi los topónimos n’asturianu qu’apaecen nel tresporte públicu pola versión españolizada de los mesmos”. N’Ast ve con “fondu esmolecimientu comu” esti fechu, que califica como “un procesu incomprensible y que pon en grave peligru ún de los poquísimos avances en normalización y drechos llingüísticos que s’algamaren demientres el gobiernu anterior del conceyu”, de PSOE ya IX.

Asina, esplique, pue vese como apaecen topónimos como “Cerillero”, “Poago”, “Las Mestas”… en cuentes de los correchos y oficiales “El Cerilleru”, “Puao”, “Les Mestes”., pesie a qu’estes caberes yá son les oficiales y a que’l Conceyu de Xixón fizo nel so momentu una campaña pa esparder y recuperar los nomes tradicionales de parroquies, pueblos y llugares.

Dende N’Ast enfótense en qu’esto “nun seya más qu’un fechu circustancial que s’igüe aína, nel comencimientu de que la corporación municipal d’anguaño”, que “nun pue ser más antiasturiana -o a lo menos presume d’ello- que les anteriores del PSOE-IX”. Recuerden amás que la presencia de Carlos Rubiera al frente de la Conceyalía de Cultura habría suponer “una garantía pa la nuesa llingua, por muncho qu’heba de reconocer que “hasta agora dende la so Conceyalía de cultura nun fizo un res pa la reconocencia de los drechos llingüísticos de los xixoneses nin pa la normalización social de la llingua”, afirmen dende esta organización.

EMTUSA destacare nos años últimos pol usu xeneralizáu del asturianu dientro de los sos autobusos, en cartelería, toponimia, etc.

Cola idea d’ayudar a les families del conceyu a superar esta vuelta a la escuela “que tan difícil ta poniéndonos la crisis y el paru que sufrimos”, el C.S.A. “La Semiente” pon en marcha una campaña de recoyida de material escolar y llibros de primaria y de la E.S.O. correspondientes al cursu 2011- 2012.

Aquelles persones que quieran donar los llibros del cursu pasáu de los sos fíos, van poder facelo nel llocal de “La Semiente”, o llamando al teléfonu 696 209 016 pa que pasen a recoyelos. Estos llibros van quedar a disposición de les families que los precisen nel mesmu llocal de l’asociación, asitiáu na Cai García Jove, 6 de L’Entregu, onde les persones interesaes pueden pasar a escoyer los que-yos valgan pal cursu qu’empieza (2012- 2013) a partir del día 10 de setiembre.. A tal efectu, el llocal de l’asociación “La Semiente” va permanecer abiertu al públicu tolos miércoles y xueves de 5 a 7 de la tarde.

Asina mesmo, “La Semiente” tien la intención d’ampliar nun futuru esta iniciativa cola creación d’una Caxa de Solidaridá Vecinal, que recaudará ayuda pa les families del conceyu a les que la crisis ta poniendo en situación más precaria, y sobre la que se facilitaran más detalles en feches próximes.