Atención a les Persones destina n’Uviéu un millón d’euros por que les entidaes sociales contraten desemplegaos. La conceyalía uvieína que dirixe la conceyala Marisa Ponga alza en más d’un 30% el financiamientu destináu a contrataciones pa realizar proyectos de calter social.
L’órganu de subvenciones aprobó esta selmana de forma provisional la concesión de subvenciones a entidaes ensin ánimu d’arriquecimientu pa la contratación de persones desemplegaes pa facer proyectos de calter social. Na presente convocatoria, la Conceyalía d’Atención a les Persones ya Igualdá, que dirixe la conceyala Marisa Ponga, destina un millón d’euros, que supon una medría del 34% al respective de la última convocatoria.
D’esta convocatoria van beneficiase 29 entidaes, que cumplen colos requisitos y superen la puntuación mínima esixida. La conceyala Marisa Ponga destaca qu’esti programa supon un importante impulsu por que les empreses del tercer sector puedan desenvolver los sos proyectos. En total prevense 46 contrataciones de persones en situación de desempléu. Ente les entidaes sociales que s’inclúin nesta aprobación provisional figuren l’Asociación Albéniz, la Fundación Padre Vinjoy, que plantegen once contrataciones en total. Tamién formen parte de los beneficiarios la Fundación d’Acción contra la Fame, CESPA Proxecto Home, Aspace, Aspaym, Calce o Secretariáu Xitanu, ente otres entidaes.
Esisten trés llínees d’actuación qu’inclúin proyectos empobinaos a persones con discapacidá o en situación de dependencia, precariedá o esclusión social; entidaes con un presupuestu cimeru a 80.000 euros, que contraten siquier a cuatro persones; y proyectu rellacionaos con un itinerariu formativu que favoreza’l futuru insertamientu llaboral de les persones oxeto de dicha formación; proyectos empobinaos a la contratación de personal que suponga xuna meyora na estructura de la entidá; o proyectos d’interés social qu’impliquen la contratación de personal pa la realización d’actividaes nueves o complementaries de les que la entidá realiza davezu.