Asturies ye la tercer comunidá autónoma que llee más prensa na rede

Según un informe que fizo públicu’l Ministeriu de Cultura, la “Encuesta de vezos y práctiques culturales 2007”, el vezu de lleer diariamente prensa d’información xeneral na rede de redes ta bien afitáu n’Asturies, siendo la tercer comunidá, dempués de Cantabria y La Rioja, con mayor porcentaxe de llectores diarios na rede.

Asina, el porcentaxe de persones qu’acceden a les páxines Web de prensa xeneral cada día en Cantabria ye d’un 11,6%, el mayor en tol estáu. Darréu ta La Rioja, col 9,3% y en tercer llugar Asturies, col 7,4%, les Islles Baleares y Navarra, dambes dos col mesmu porcentaxe qu’Asturies.

L’informe fechu públicu pol Ministeriu Cultura da datos tamién de la frecuencia de llectura. Los asturianos que consulten les páxines de noticies unu o dos díes per selmana algamen hasta un 5’4%, penriba de la media estatal, que ta nun 3’8%, anque perbaxo del 7’3% ó’l 6’1% de Baleares y Madrid respectivamente.