Esti martes, 21 de febreru, a les 19.30 hores, nel local social del Atenéu Obreru de Xixón (Calle Cuadonga, 7 – 1o Izda.), ÁSTURA tien programada una conferencia sobre “Arte popular de tradición barroca n’horros y paneres asturianos”, a cargu del Doctor en Historia Jesús Antonio González Calle.
A naide escápase-y que l’horru y la panera son los elementos más característicos de l’arquitectura popular asturiana, decisivos na configuración del nuesu hábitat y paisaxe rural. Sicasí, l’horru prototípicu ye’l productu d’una llarga evolución que parte, cuandoquier, de tiempos medievales.
Estudios recién empezaron a definir qué s’entendía por horru en tiempos altu y plenu medievales, y cómo se va constituyendo’l modelu d’horru de tablones de madera escontra’l sieglu XIV (qu’en términos historiográficos defínese como «horru patrón»). Ye precisamente esi horru patrón, propiu una sociedá llabradora, el qu’apurre un ampliu soporte pal desenvolvimientu de manifestaciones artístiques de calter pictóricu o de talla qu’aína tomen como referencia elementos artísticos «cultos», como portaes d’ilesies, retablos, cubriciones, moblame, etc., magar cronolóxica y estilísticamente son heterogéneos. Esta circunstancia esplica’l frecuente anacronismu de los gustos artísticos populares, que caltienen o reactiven traces de tradición románica o barroca mientres llargu tiempu tres la caducidá de dichos estilos.
Los horros asturianos empiecen a incorporar nel sieglu XVI elementos artísticos medievales próximos a ello, como’l románicu (que de la mesma puede entestar motivos bien anteriores) o’l mudéxar. La evolución morfolóxica qu’esperimenta l’horru hasta xenerar la panera dexa esquemes compositivos más ambiciosos que s’estienden per puertes, colondres, vanos y balaustraes yá a mediaos del sieglu XVIII, momentu culminante del arte aplicao a horros y paneres. Esti mayor mapa decorativu va enllazar perfectamente colos gustos barrocos entá latentes en dicha dómina; los artistes van distribuyir los motivos ornamentales en base a un ritmu y harmonía visual col mesmu curiáu que cualquier fachada arquitectónica.
L’ésitu d’estes fórmules cristaliza nuna tradición barroca que se va enllargar mientres tol sieglu XIX y parte del XX, por más que la so execución manifiesta una evolución empuesta a simplificar los diseños dieciochescos y a arriquecer el repertoriu del arte popular asturianu, munchos de que los sos motivos pueden rastrexase perfectamente na talla tradicional que se desenvuelve anguaño.
Jesús Antonio González Calle ye Doctor n’Hestoria pola Universidá d’Uviéu (2001) y profesor del Departamentu de Ciencies Sociales del I.E.S. César Rodríguez de Grau. Empezó la so trayectoria investigadora centrándose na hestoria local (llibru “Historia de Corvera d’Asturies y la so área”, 1996), onde apigura diverses perspectives d’estudiu (xenealoxía, arte, etnografía, arqueoloxía, etc.), que va tener ocasión de desenvolver en trabayos posteriores. D’esta miente, centráu na Edá Media y na hestoria social, ellaboró la so tesis doctoral “La nobleza n’Asturies mientres la Baxa Edá Media: xénesis y evolución de llinaxes representativos” (premiu de Investigación Juan Uría Ríu, 2002).