Apaecen documentos perimportantes pal estudiu del llevantamientu d’Asturies en 1808

L’Asociación pa la Recreación Hestóricu-Cultural d’Asturies (ARHCA) ta acabante anunciar que dos de los sos miembros, José Luis Calvo, collaborador y Antonio Luis Pérez, presidente, descubrieron los llibros d’actes de la Xunta Suprema d’Asturies, lo que supón un “hestóricu y perimportante impulsu col descubrimientu d’una documentación, en paraderu desconocíu dende va cuasi doscientos años”.

Los papeles, comenten, “contienen información de primera mano alredor de la parte de la llucha escontra l’invasor francés que se llibró n’Asturies”.

Los documentos desapaercieren en mayu de 1809 y diéronse por perdíos ente 1814 y 1815, cuando se recompuso l’archivu de la Xunta Xeneral d’Asturies. Estos “llibros o cuadernos d’actes” daben testimoniu de tolo alcordáu pola Xunta, primera en declarar la guerra a Napoleón en mayu de 1808, de les sos delliberaciones y los oficios y noticies que recibía.

Dende esti mes los documentos tán dixitalizaos y al algame de cualesquier investigador, incluyendo los “llibros d’alcuerdos” de la Xunta dende setiembre de 1808 hasta payares de 1809. Los investigadores nun descarten más afayos.