El sindicatu de la enseñanza pública ANPE encamentó esta selmana al Executivu rexonal a que concrete la ufierta de places pa les oposiciones a docentes, una vegada que yá se conoz qu’Asturies va cuntar con presupuestos pa 2017.
«Agora que yá sabemos qu’en 2017 Asturies va haber presupuestos, ye imperativa la convocatoria de la Mesa Sectorial d’Educación pa tratar la ufierta pública d’empléu», reclama la organización, qu’aportuna en que los opositores precisen saber qué especialidaes y qué númberu s’embaraxa.
Nun informe recién, ANPE sollertaba de que’l sistema educativu públicu d’Asturies precisa de 902 maestros. El sindicatu tamién considera importante conocer si los presupuestos del Estáu van dexar a les comunidaes autónomes cubrir el cien per cien de la tasa de reposición, y si la conferencia sectorial d’educación va ser capaz d’alcordar una política d’ufierta qu’evite la falta de coordinación actual, que favorez efectos llamada.