Andecha pide a Siero y Noreña que contemplen valorar la conocencia d’asturianu pa los empleos públicos

Los Conceyos d’Andecha Astur de Siero y de Noreña consideren que dende los Ayuntamientos mentaos “tienen de siguir l’exemplu de los de L.lena y Cangas, ya incluir dientro de los méritos puntuables p’acceder a emplegu públicu ufiertáu l’asturianu”. Poro, pídeyos a los gobiernos municipales qu’incluyan la conocencia de la llingua asturiana como un méritu.

Andecha Astur camienta que ye “perfectamente asumible polos ayuntamientos de Siero y Noreña”. P’Andecha ye “lóxico y normal que se valore positivamente la conocencia de la llingua asturiana a la hora de trabayar nuna Casa Conceyu dende la que se tien qu’atender a ciudadanos y ciudadanes que, según afita la llexislación vixente, pero sobre too el sentíu común, tienen el drechu de rellacionase cola Alministración pública n’asturianu, si asina-yos peta”.

P’AA “nun ye lóxico que se puea valorar, por exemplu, un cursin de mecanografía y non el conocimientu de la llingua propia, más cuando los vecinos y vecines tienen derechu a usala”.