Andecha Astur llama a participar nel manifestamientu pola Oficialidá de la Llingua Asturiana que se cellebrará esti prósimu vienres 9 de mayu pola “situación de represión y amenorgamientu llingüísticu que carecemos n’Asturies” y que “obliga a toos y caún a participar nuna movilización na que la oficialidá de la llingua asturiana tien de ser motivu abondu pa superar desalcuentros y desenfotos”. Ello asina Andecha Astur fai un llamamientu “al conxuntu de la sociedá asturiana pa que participe activamente nel manifestamientu entamáu pal prósimu Díi de les Lletres Asturianes (vienres 9 de mayu) a les 19:30 hores, con salida de la Estación de la RENFE d’Uviéu”.
Una vuelta más, diz la nota de prensa qu’asoleyara esti día la organización nacionalista asturiana, “movilizaremosmos p’algamar el drechu del Pueblu Asturianu a la oficialidá de la so llingua, drechu democráticu que mos ñeguen el conxuntu de partíos con representación na Xunta Xeneral, col destacáu casu d’hipocresía reinal d’Izquierda Xunida, organización cuya reivindicación y defensa de la oficialidá consiste n’activar y desactivar plataformes llingüístiques (el Conceyu Abiertu Pola Oficialidá fo’l caberu), y a facer promeses preellectorales comprometiéndose cola oficialidá de la llingua, pa escaeceles sigún los espacios de poder que negocie col PSOE”.