Andecha Astur formalizó una solicitú de referendu sobre l’Estatutu nel rexistru de la Xunta Xeneral

Militantes y simpatizantes d´Andecha Astur concentráronse ayeri, miércoles 13 d’agostu a la una la tarde, énte la Xunta Xeneral respondiendo a la convocatoria de la organización d’izquierda nacionaliega pa vindicar el drechu de los asturianos y asturianes a votar l´Estatutu d’Autonomía d’Asturies énte ésta segunda reforma y col precedente, qu’Andecha recordó nun comunicáu “de qu’enxamás el pueblu asturianu foi consultáu pa refrendar l’estatutu, nin la so primer reforma, nin la propia institución del Principáu”.

Con esti actu Andecha Astur quixo denunciar, según esplicó’l so secretariu xeneral Daniel Cueli, “la falta de democracia y la discriminación esistente n´Asturies, yá que tamos énte la reforma del estatuto que rexirá la vida de les y los asturianos los próximos años, y nin si quier se mos permite votar, dalgo que si pudieron facer ciudadanos d’otros territorios del estáu como Andalucia, Cataluña o Galicia”.

En pallabres de Daniel Cueli, “con esta reforma Asturies va p’atrás envede p’alantre yá que sigue ensin reconocese’l derechu d’autodetermín del pueblu asturianu. Buscamos un derechu básicu, que nun ye más que los asturianos puen escoyer el modelu políticu, economicu, social y cultural que quieren” y remarcó la vulneración d’otru drechu democráticu básicu: “la oficialidá de la Llingua Asturiana, la principal seña d’identidá d’Asturies”.

El representante d’Andecha Astur señaló que PSOE y PP “Nun sólo nun permiten al pueblu asturianu participar na reforma, sinón que tampoco mos permiten decir si tamos d’alcuerdu” y criticó la “postura a dos bandes” d’IU, ente quien piden el derechu de los asturianos al votu, como Francisco Javier García Valledor, y los que non, como’l voceru parllamentariu Jesús Iglesias.

Amás de la propia concentración, Andecha Astur presentó nel rexistru una petición desixendo´l drechu de los asturianos y asturianes a poder votar l’estatutu. La petición foi puesta a dimposición de tou aquel que la quixere facer de so. Con too ello, alredor de mediu centenar de presones presentaron nel rexistru la solicitú.

A la hora de presentar la solicitú les persones elli concentraes atoparon problemes pa poder entrar al rexistru. Los policies presentes nun dexaron entrar a la Xunta Xeneral más qu’una persona de cada vez, presllando a cada viaxe la portiella de la Xunta Xeneral, allargando con ello´l tramite burocráticu fasta llegar cuasi a la hora y media.

Mentántenes se diben formalizando les peticiones de referendu, los ellí presentes, foron pintando unes lletrones que yá xuntes y pintaes formaron el llema “Queremos Votalu” delantre de la Xunta Xeneral. L’actu finó cola xente qu’entovía quedaba, tres el llargu procesu pa formalizar les peticiones en rexistru, posando ente la entrada a la Xunta Xeneral colos cartelos de la campaña “¡Queremos votalu!”.