Andecha Astur entruga nel Congresu “por qué se mintió énte’l Conseyu d’Europa sobre la situación de la llingua asturiana”

La organización política Andecha Astur ta acabante presentar nel Congresu los Diputaos, al traviés d’Esquerra Republicana de Catalunya (ERC), partíu sociu de la formación asturiana na coalición Europa de los Pueblos, una entruga na que-y esixe al Gobiernu español que dea les desplicaciones oportunes “sobre les mentires treslladaes al Conseyu d’Europa no que cinca a la situación actual de la llingua asturiana y que se recueyen nel informe sobre les llingües minoritaries asoleyáu va unes selmanes”.

Ente les mentires denunciaes por Andecha Astur ta la de que’l “non reconocimientu d’oficialidá del asturianu debíase a la falta de normalización de la llingua y d’una lliteratura escrita afayadiza”, lo que pa la formación independentista “amuesa la mala intención pela parte de les autoridades competentes y que contrasta colo que se diz dende l’organismu européu”.

Andecha Astur recuerda que “demientres la visita nel territoriu informóse al Comité d’Espertos que l’Academia de la Llingua Asturiana tenía finada la versión normalizada de la llingua (diccionariu, gramática, nomenclatura de los topónimos) y que tamién hai consensu social sobro l’emplegu de la llingua (el 60% de la población ta a favor de la cooficialiá)”.

Andecha Astur, amás de pidir al Gobiernu español qu’esclariase a la ciudadanía asturiana “por qué se mintió nel informe unviáu al Conseyu d’Europa”, pidió tamién que cumpliere cola Carta Europea de les Llingües Rexonales o Minoritaries, que tien roblada, y colos encamientos del organismu européu, presionando nesti casu al Gobiernu d’Asturies pa que declare la oficialidá de la llingua asturiana.