Andecha Astur denuncia “la filosofía y la programación” del teatru de La Llaboral de Xixón

Nel primer aniversariu de “Llaboral, Ciudá de Cultura” la formación política Andecha Astur súmase a les crítiques de los profesionales del teatru asturianu “a la filosofía y programación de Laboral Escena”. Denuncia una programación “elitista y asturianófoba” al empar que reclama La Llaboral como una “socadarma perafayadiza pal aniciu d’un Centru Dramáticu Nacional Asturianu”.

Cuando se cumple un añu de la puesta en marcha de “Llaboral Ciudá la Cultura”, p’AA yá quedó nidio qu’el proyeutu de Laboral Escena, dirixíu por Mateo Feijoo, “non solo ye elitista -entá nun foi a aconceyar a más de mediu centenar de persones nos sos espeutáculos- sinon que carez d’una inxustificable asturianofobia -a estes feches entá nun implicó nel so proyeutu a denguna compañía profesional de teatru asturiana-“.

Con esta protesta, diz la nota de prensa, “Andecha Astur quier amestase a les dures crítiques emitíes por estremaos profesionales del teatru asturianu, que non solo denunciaren los fechos enantes remarcaos, sinon que solliñaren «la indiferencia rayana nel despreciu más asolutu» col que son trataos, y la contradición esistente ente los términos «Laboral» y «asturiano», fasta’l puntu de llegar a coproducir con compañíes gallegues y non asturianes”.

Andecha Astur atalanta amás que tala filosofía, “propia del PSOE n’Asturies”, parte de la base “de que nada asturiano ye bono, nin la nuesa cultura nin los nuesos profesionales”, entrando na dinámica, continuen “-tamién denunciada polos profesionales asturianos del teatru- de formar a xóvenes actores y actrices, músicos o baillarines, pa llueu obligalos a emigrar”, mientres comenten dende Andecha Astur “«Laboral Escena» absorve una gran parte del presupuestu asturianu de cultura pa pagar y desendolcar les artes escéniques d’otres comunidaes del Estáu español”.

Per otru llau, Andecha Astur entiende que siendo la Llaboral l’únicu teatru «autonómicu» esistente n’Asturies y las especiales carauterístiques que reune, “faenlu idóniu p’aniciar un Centru Dramáticu Nacional Asturianu que dea xuegu y puxu a toles enerxíes creatives esistentes n’Asturies, plantegándose tanto la proyeición de produciones propies comu l’aniciu y ampliación de públicos tanto del nuesu país comu de fuera del mesmu”.