Anabel Santiago: “Tamos viendo’l fin de les discográfiques, los artistes han garrar les riendes de les sos carreres”

Llama l’atención qu’una de les meyores cantadores de tonada d’anguaño ñaciere en Bonos Aires (L’Arxentina), pero al sentila nun sorprende l’ésitu que la lleva acompañando dende qu’entamó nesto de la canción asturiana, con trece años. Anabel Santiago ñació en 1981 y namás diecinueve años más tarde tenía yá una cai dedicada a la so figura na capital d’Asturies, y detrás, delles grabaciones y premios a esgaya. Agora prepara discu nuevu, el quintu, y Asturnews fala con ella pa conocer enantes que naide los detalles d’un trabayu mui esperáu.

-Lleva delles selmanes grabando discu nuevu, ¿qué mos pue cuntar del procesu?

-La verdá ye que foi un procesu sorprendentemente rápidu y eficaz, con una conexón especial colos músicos y técnicos. Puedo resumilo nun llabor cooperativu perfectu. Los temes yá taben pensaos por min, y tanto Héctor Braga (productor musical del discu) como’l restu de músicos supieron captar la idea del soníu que buscaba pa da-yos vida.

-¿Pue adelantanos el títulu?

-Tengo la costume de nun adelantar el títulu por una cuestión de superstición.

-¿Qué vamos atopar de nuevo na voz d’Anabel Santiago nesti discu?

-Esti ye un discu enforma especial y diferente pa min, porque aparte d’autoeditame y autoxestiname soi tamién la compositora y lletrista de munchos de los temes que lu componen, polo que la interpretación siempres ye más personal y dedicada, más cuidada. Dime cuenta que la fuercia que tresmito en dalgunes pieces salen directamente del corazón y de les ganes que-y punxi.

-¿Tira más nesti proyectu del repertoriu tradicional o de lletres y cantares nuevos?

-Préstame siempres facer un mixtu, hai temes nuevos y temes tradicionales versionaos, con sellu mui personal, pero como te dicía, les lletres na so mayor parte, son nueves.

-¿Con qué collaboraciones va cuntar nel nuevu trabayu?

-Cunto con músicos de primer llinia del panorama musical asturianu, xente qu’a partir de agora van entamar a formar parte de la mio banda nueva: Héctor Braga, Eduardo Salueña (Cuac, Senogul), Manuel Cordero (Ástura) y Borja García (Muñeco Vudú, Los Ministros)

-Cuando a una edá tan moza como la de so, yá tien una cai col so nome, cásique tolos premios posibles, etc. ¿Queden tovía retos por llevar alantre?

-Esti qu’entama ye unu d’ellos. L’aventura d’entamar una etapa onde yes la responsable de tol productu final ye perinteresante. Tienes que facer los llabores executivos, artísticos, organizativos… ye un retu en sí mesmu, y prestábame animar a los artistes asturianos a que cueyan les riendes de sos respectives carreres, porque tamos viendo’l fin decadente de les compañíes discográfiques y sucedáneos, y ye’l momentu de trabayar pa nós.

-Ponénla siempres, xunto con otros cantadores mozos, como exemplu de lo bien que se plantega’l futuru de la tonada, ¿pero como lo ve usté, ta tan garantizao como se diz?

-Eso dirálo’l tiempu, de momentu hai una cantera resurdiendo. Yo esto dígolo con conocimientu de causa, porque nes clases qu’imparto de tonada n’Uviéu, Cangues d’Onís, Noreña… tengo un alumnáu abondo mozu que ta comprometíu col xéneru. Soi positiva nesti momentu.

-Como comenta, dedícase tamién a la formación de nuevos artistes, ¿qué aptitúes hai que tener pa la tonada?

-Una bona intuición auditiva, y una apasionada disposición a aprender con sacrificiu y paciencia. Imaxino que como en toles artes.

-¿Llega la tonada al públicu mozu, cómo se consigue facelo?

-Llega más que llegaba, por suerte tamos asistiendo a una potenciación del xéneru na televisión, y paez que a poco y a poco va calando na xente. Ye necesario siguir faciendo que la cultura tradicional seya dalgo común nes nueses vides.

-¿Qué más proyectos tien en marcha?

-Toi volcada plenamente nel llanzamientu del nuevu discu, que verá la lluz nun mes aproximadamente. Y yá toi pensando n’otru discu de carácter más tradicional que nun se fadrá esperar muncho más, en collaboración con Héctor Braga, qu’aparte de ser el productor musical del discu que ta pa salir, crea una dimensión muncho más amplia de la mio forma d’entender la música tradicional gracies a la so aportación instrumental y vocal.