La catedrática d’Economía Financiera y rectora de CUNEF Universidá, Ana Isabel Fernández Álvarez, foi nomada esti día presidenta electa de la Fundación Princesa d’Asturies por aclamación del Patronatu de la institución na xunta estraordinaria celebrada con un formatu híbridu, n’Uviéu y de forma telemática. El so mandatu fadrase efectivu a partir del mes d’avientu de 2022.
Ana Isabel Fernández Álvarez va asoceder nel cargu a Luis Fernández-Vega Sanz que, tres cuatro años al mandu de la Fundación, yera’l quintu presidente de la institución, dempués de Matías Rodríguez Inciarte (2008-2018), José Ramón Álvarez Rendueles (1996-2008), Plácido Arango Arias (1987-1996) y Pedro Masaveu Peterson (1980-1987). Esti nomamientu produzse tres l’arrenunciu, por motivos sobreveníos de salú, presentada énte’l presidente del Patronatu por Mauro Guillén Rodríguez, quien, el pasáu mes de mayu, fuera designáu pa desempeñar el cargu.
Rectora de CUNEF Universidá, catedrática d’Economía Financiera, doctora n’Economía de la Empresa (1985) y llicenciada en Ciencies Económiques y Empresariales pola Universidá d’Uviéu (1981), ye miembru del Patronatu de la Fundación dende l’añu 2015 y formó parte del xuráu del Premio Princesa d’Asturies de la Concordia en delles ediciones.
Forma parte del Conseyu d’Alministración de Mapfre, S.A y del Conseyu de Bolsa de Madrid (Grupu BME), foi conseyera de la Comisión Nacional del Mercáu de Valores (2010-2014). Na Universidá d’Uviéu ocupó los cargos de secretaria del Conseyu Social (1986-1991), decana de la Facultá de Ciencies Económiques (1994-1998), vicerrectora de Posgráu y Títulos Propios (2000-2004) y vicerrectora d’Investigación (2004-2005).