Ana Cano va aconceyar cola Presidenta de la Xunta Xeneral del Principáu pa face-y llegar les propuestes de l’ALLA al rodiu del estatus xurídicu de la llingua asturiana

Según informe dende l’ALLA, güei vienres, a les 13,30 hores, la Presidenta de la Xunta Xeneral recibirá a la Presidenta de l’Academia de la Llingua Asturiana. L’oxetivu de la entrevista, de la que yá diere anuncia Ana Cano nel discursu institucional del “Día de les Lletres Asturianes” del pasáu 9 de mayu, ye treslladar al parllamentu asturianu la posición y propuestes de la institución llingüística no que cinca al tratamientu llegal qu’habría tener la llingua asturiana nel nuevu Estatutu d’Autonomía d’Asturies qu’agora mesmo tán negociando les fuerces polítiques asitiaes na Xunta Xeneral.

A tal efeutu, Ana Cano pidirá a María Jesús Álvarez que faiga llegar a la ponencia de la reforma estatutaria los plantegamientos y el compromisu de l’Academia cola solución definitiva de la cuestión llingüística. L’Academia de la Llingua Asturiana tien el máximu enfotu en que les sos propuestes y argumentos seyan acoyíos polos partíos políticos (FSA-PSOE, PP ya IU) col interés y atención que la sobrevivencia de la llingua histórica d’Asturies merez.