Tres de la denuncia fecha pública pola propia afectada, la filóloga Yolanda Magdalena Montes, y pol director de la Oficina de Política Llingüística, Ramón d’Andres, foron dalgunos de los propios miembros del RIDEA los que se quexaron públicamente de l’actitú de tala institución, al negase a aceptar una ponencia escrita n’asturianu pal so Congresu d’Estudios Asturianos. Les crítiques de Javier Fernández Conde y la postura de Jose Luis Campal, qu’amás de llamentar esta grave situación decidió retirar la ponencia qu’el mesmu tenía pensao aportar na istitución a la que pertenez, foron soscrites por Ana Cano, presidenta de l’Academia de la Llingua Asturiana, que tachó esti fechu d’ ‘esperpentu’ y ‘atropellu’ a la llingua.
Ana Cano afirmó que ‘ye impresentable y esperpentico qu’un congresu d’estudios asturianos, organizáu por un institutu d’estudios asturianos, que depende d’una Conseyería de Cultura que tien de velar polos derechos llingüísticos de tolos falantes d’asturianu, se niegue a almitir una ponencia porque se presenta nesta llingua’ cuando, amás, nes bases de talu congresu nun s’indica nada sobre esti asuntu.
La presidenta de l’ALLA ve esta situación como una ‘vergüenza propiciada por una política cultura tebia’, asegurando que la que tien qu’actuar nesti casu ye la propia Conseyería de Cultura del Principáu, al ser el RIDEA un ente que depende económica y institucionalmente d’ella.